Der erschte Monet im nuia Jahr,
des isch ond bleibt dr Januar.
Mr nimmt sich vor, wiea soll i saga
mol wieder ebbes NUIS zum waga.
An Vorsatz den mir äll Johr fasset
ond moischtens doch beim alta lasset.
Hano des Johr isch jo no jung,
do bringt mr manches no en Schwung.

Dr Februar isch älls no kalt
Ond Obends dunkelts au no bald.
Oft gibt' no Schnee ond kalta Wind,
im zwoita Monet mir jetzt sind.
Doch Lichtmeß isch im Februar,
do wird's dann wieder heller
ab zwoita, des isch währle war,
ab Lichtmeß do gots schneller.

                                         Im Dezember isch Advent
                                              Mir zündet Kerza a,
                                        dia stecket auf ma Tannenkranz
                                              mit rote Bändle dra.
                                         Jetzt gohts au mit em Backa los,
                                         denn d`Weihnachtszeit kommt bald,
                                         Stolla, Guatsla, Springerla,
                                         gute  Sache  halt.
                                         Wenn dann d`Weihnachtszeit vorbei,
                                         no dauerts nemme lang,
                                         denn an Silvester tuats an Schlag
                                         ond`s neue Johr fängt an.
                                         Des war zu älle Zeita so
                                         und wird au immer sei
                                         Drum ganget mir mit frohem Mut
                                         Ins`neue Johr jetzt nei.

                                               
                                               Der November  isch dr Monet
                                               Mit Nebal  trüab ond grau       
                                               Selta isch dr Sonnaschei
                                               Ond schneiela  ka's au.
   
                                               Morgens wird s  erscht später hell,
                                               mr got net gern vors Haus,
                                               und am Obend dunkelts bald,
                                              `s Feuer goht net aus.

                                               Dr  11. Monet  hent mr jetzt
                                               Des Johr isch bald vorbei.
                                               Dezember stoht jetzt vor dr Tür,
                                               mir lasset en halt rei.         
 

                                Im Oktober unterwegs, em lichta Sonnaschei,
                                über Wiesa, Wald und Weg, nix ka schöner sei.
                                Bäum dia leuchtet purpurrot und mit gelbe Flecka.
                                Drüba dort, dui Felswand duat, sich zum Himmel strecka.
                                D`Sonna leuchtet noch mal warm vom blaua Himmel runter
                                Ab und zua dr Nebel ziagt, macht die Welt no bunter.
                                Jo d`Natur isch wunderschö, do muas mr losmarschiere.
                                denn des ka scho über Nacht kalt sei ohd au g`friera.

                                   Im September bläst dr Wind
                                   Über Stoppelfelder.
                                   Ond es dukelet jetz au
                                   Scho a bissle bälder.

                                   Im Wengert werdet Trauba reif,
                                   dort am Hang dort drüba,
                                   Ond dia Baura fahret naus
                                   Auf de Felder pflüga.
                                  
                                   Äpfel, Birna klaubt mr auf,
                                   tuat se nei ins Säckle
                                   do draus macht mr Moscht ond Saft
                                   mit ma guata  G`schmäckle.
                                   
                                    Wia der Witsch isch `d Zeit vorbei
                                    Mr ganget en Oktober nei.
                                  

                                                 Sommerzeit isch im August
                                                     Auf dr Alb a warme Luft.
                                                    Droscha wird an älle Ecka,
                                                  Brombeer reifet in de Hecka
                                                Auf de Bäum, des isch an Säge
                                                       reifet  Äpfel, Mirabella,
                                                Birna, Zwetschga ond Hollunder,
                                                   jo d`Natur isch voller Wunder.
                                              Schulfrei isch jetzt au für d`Kender,
                                                     Feriazeit isch bis September.

                                                Juli isch, Zeit vergoht,
                                       dr Sommer vor der Tür jetzt stoht.
                                          Wolka hoch am Himmel droba,
                                           Sonnenschei und Regaboga. 
                                              Frühkartoffel holt mr her, 
                                        zupft Träubla ond au Stachelbeer. 
                                       Do raus kocht mr, was willsch meh,
                                                 Marmelade ond Gellee. 
                                       Jetzt isch des scho der Monet sieba, 
                                           mo isch blos dui Zeit verblieba,
                                      des halbe Johr isch nur so g'flutscht 
                                    ond viel zu schnell kommt dr Auguscht.

                                                  Im Juni do isch Heuet-zeit
                                              Mos immer wieder G`witter geit.
                                           `s gibt hoiße Täg ond kühle Nächt,
                                            so wiea mir`s eigentlich jo möcht.
                          
                                                  Holunder blüht an älle Eckka,
                                        dr Saft von dem isch guat zum schmecka.
                                            Ond auch `d Kirscha schmecket fei,
                                                  ond  Erdbeerkucha  obadrei.
                                                       Im Juni isch Johannistag
                                             Mit Sonnawend, ond uff oim Schlag
                                                      Isch dr Juni fascht vorbei
                                                       mir ganget in da Juli nei.

                                          Jetzt kommt dr Mai, der Himmel blau
                                          Do regnets immer wieder au.
                                          Ond uff de Wiesa überall,
                                          am Berghang oder au em Tal,
                                          do blühet Blümla, `s isch a Pracht,
                                          fascht könnt mr glauba über Nacht
                                          tuat sich der Himmel auf ond sait,
                                          jetzt freut euch doch....`s  MAIAZEIT:

                                                      Nummer vier isch dr April,
                                                der woiß nie recht was er will.
                                                     Regawetter, Sonnaschei,
                                                on an Schnee au zwischanei.
                                                     Wärmer Täg ond kalte Nächt,
                                                 jo mr woiß halt niea so recht,
                                                      was dr Tag oim bringa will,
                                                des isch typisch dr April.

                                               Im März do reget sich dia Leut,
                                               weil´s überall viel Ärbet geit
                                               im Garta ond en Wald ond Flur,
                                               jetzt regt sich überall d`Natur.
                                               Dr Mischt ond Gülle bringt mr naus,
                                               ond Weiber ganget aussem Haus,
                                               dr Gartaboda der wird gluftet,
                                               damit no später Bluma durftet.
                                               Ond dass ihrs wisset, i sag´s glei,
                                               jetzt isch dr Monet Nummer drei.